ໃນວັນທີ 29 ທັນວາ 2020, ສູນສະຖິຕິປະຈຳແຂວງອຸດົມໄຊ ໄດ້ຈັດ “ກອງປະຊຸມຖອດບົດຮຽນກ່ຽວກັບວຽກງານສະຖິຕິສາຍຕັ້ງ ປະຈຳປີ 2020”. ກອງປະຊຸມແມ່ນໄດ້ຮັບກຽດການເປັນປະທານໂດຍ ທ່ານ ສົມລິດ ລັດສະເກດ ຮອງເລຂາຄະນະພັກຮາກຖານ ພະແນກແຜນການ ແລະ ການລົງທຶນ, ຫົວສູນສະຖິຕິປະຈຳແຂວງ. ໂດຍມີຄະນຳ ສູນສະຖິຕິປະຈຳແຂວງ, ຫົວໜ້າ/ຮອງຫົວໜ້າສູນສະຖິຕິປະຈຳເມືອງ 7 ເມືອງ ແລະ ວິຊາການຂັ້ນແຂວງ, ເມືອງ ເຂົ້າຮ່ວມ ລວມທັງໝົດ 26 ຄົນ, ຍິງ 2 ຄົນ.
ຈຸດປະສົງຂອງກອງປະຊຸມແມ່ນ ເພື່ອຖອດຖອນ, ແລກປ່ຽນ ບົດຮຽນ ແລະ ຕີລາຄາຈຸດດີ ແລະ ຂໍ້ຄົງຄ້າງໃນການຈັດຕັ້ງປະຕິບັດວຽກງານສະຖິຕິສາຍຕັ້ງໃນໜຶ່ງປີຜ່ານມາ. ໃນກອງປະຊຸມໄດ້ນຳເນື້ອໃນມາປຶກສາຄື ການວາງແຜນງານ, ທິດທາງ ແລະ ຄາດໝາຍວຽກງານ ສະຖິຕິ 5 ປີ ຄັ້ງທີ 2 (2021-2025), ການຫັນວຽກງານສະຖິຕິເປັນທັນສະໄໝວຽກງານສະຖິຕິແຂວງອຸດົມໄຊ, ການປ່ຽນປີຖານຄິດໄລ່ GDP ຂັ້ນແຂວງຈາກປີ 1996 ມາເປັນປີ2012, ການຄິດໄລ່ລາຍຮັບຂັ້ນເມືອງ, ການຜະລິດຕົວຊີ້ບອກທ້າງຂໍ້ມູນສະຖິຕິເສດຖະກິດ-ສງັຄົມ, ເກັບກໍາຂໍ້ມູນຂໍ້ມູນສະຖິຕິຂັ້ນທ້ອງຖິ່ນ ແລະ ການເຜີຍແຜ່ຂໍ້ມູນສະຖິຕິທາງການ.
ໃນໂອກາດນີ້,ທ່ານປະທານກອງປະຊຸມໄດ້ເນັ້ນໜັກເຖິງຄວາມສໍາຄັນຂອງການສືບຕໍ່ການຈັດຕັ້ງປະຕິບັດວຽກງານການສະຖິຕິຄຽງຄູ່ກັບແນວທາງ,ນະໂຍບາຍ ແລະ ການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມໃນແຕ່ລະໄລຍະ, ການຮ່ວມມືຮອບດ້ານຂອງທຸກພາກສ່ວນທີ່ກ່ຽວຂ້ອງ, ທັງສາຍຕັ້ງ ແລະ ສາຍຂວາງ ແມ່ນເປັນສິ່ງທີ່ຈໍາເປັນ ແລະ ປາສະຈາກບໍ່ໄດ້ ໃນການບັນລຸບັນດາຄາດໝາຍ ແລະ ເປົ້າໝາຍທີ່ຕັ້ງໄວ້, ໂດຍສະເພາະ ຄວາມສໍາຄັນຂອງຄວາມເປັນເຈົ້າການຂອງບັນດາວຽກງານຂອງຕົນເອງ.ຄຳເຫັນຂອງທ່ານຫົວໜ້າສູນສະຖິຕິປະຈຳແຂວງຍັງໄດ້ເນັ້ນໜັກຕື່ມອີກວ່າເພື່ອຈັດຕັ້ງປະຕິບັດວຽກງານສະຖິຕິໃຫ້ສາມາດຕອບສະໜອງໄດ້ໃນການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມຂອງທ້ອງຖິ່ນມີຄວາມຈຳເປັນ“ພວກເຮົາຕ້ອງໄດ້ຫັນວຽກງານສະຖິຕິໄປສູ່ທັນສະໄໝ” ຊຶ່ງໃນແຜນພັດທະນາລະບົບສະຖິຕິແຂວງອຸດົມໄຊ 5 ປີຄັ້ງທີ 2(2021-2025) ໄດ້ກຳນົດໄວ້ແລ້ວ ໄປຄຽງຄູ່ກັນນັ້ນພວກເຮົາຕ້ອງມີຄວາມຮັບຜິດຊອບຫຼາຍຂື້ນ , ເອົາໃຈໃສ່ສຶກສາອົບຮົມການເມືອງນຳພາແນວຄິດເຕົ້າໂຮມຄວາມສາມັກຄີພະນັກງານໃຫ້ເປັນປຶກແຜ່ນແໜ້ນໜາ, ປັບປຸງບັນດາຈຸດທີ່ຍັງຄົງຄ້າງ, ຂັດເລື້ອກເອົາຈຸດທີ່ເປັນຜົນງານທີ່ພົ້ນເດັນເພື່ອເສີມຂະຫຍາຍໃຫ້ດີຂຶ້ນກວ່າເກົ່າ, ສູ້ຊົນປັບປຸງວຽກງານສະຖິຕິຂອງພວກເຮົາໄປນຳກັນເຮັດໃຫ້ວຽກງານສະຖິຕິແຂວງອຸດົມໄຊສາມາດແຂ່ງຂັນກັບບັນດາແຂວງໃນຂອບເຂດທົ່ວປະເທດ ເຖິງເຮົາມີພະນັກງານໜ້ອຍແຕ່ກໍ່ຕ້ອງສ້າງພະນັກງານໃຫ້ມີຄຸນນະພາບ ແລະ ສືບຕໍ່ນຳເອົາບັນດານິຕິກຳທີ່ກ່ຽວຂ້ອງກັບວຽກງານສະຖິຕິຂອງພວກເຮົາໄປເຜີຍແຜ່, ຜັນຂະຫຍາຍ ເປັນຕົ້ນແມ່ນ: ກົດໝາຍວ່າດ້ວຍສະຖິຕິ ເລກທີ 24/ສພຊ, ຍຸດທະສາດພັດທະນາລະບົບສະຖິຕິແບບຢືນຍົງ 2016-2020 ວິໄສທັດຮອດປີ 2030, ດຳລັດເລກທີ 561/ລບ, ຄຳສັງເລກທີ 19/ນຍ, ຂໍ້ຕົກລົງເລກທີ 0729/ຜທ, ແຜນພັດທະນາລະບົບສະຖິຕິແຂວງອຸດົມໄຊ 5 ປີ ຄັ້ງທີ 2 ປີ 2021-2025, ເອົາໃຈໃສ່ໃນການຜະລິດຂໍ້ມູນສະຖິຕິຕາມຕົວຊີ້ບອກ ຢ່າງມີຈຸດສຸມ, ພຽງພໍ, ສອດຄ່ອງກັບ ຂະບວນການ ແລະ ຫຼັກວິທະຍາສາດສະຖິຕິ ເພື່ອແນ່ໃສ່ສະໜອງຂໍ້ມູນສະຖິຕິ ຄົບຖ້ວນ ຊັດເຈນ ປ່ວງໃສ່ ແລະ ກວດສອບໄດ້ ແລະ ບັນດາທ່ານ ຫົວໜ້າ/ຮອງສູນ, ຄະນະນຳ ແລະ ວິຊາການຈະຕ້ອງໄດ້ນຳເອົາບັນຫາທີ່ໄດ້ປຶກສາຫາລື ແລະ ເປັນເອກະພາບ ທີ່ເປັນບົດຮຽນຖອດຖອນໄດ້ໃນກອງປະຊຸມນີ້ໄປເປັນແນວທາງເພື່ອປັບປຸງ ແລະ ພັດທະນາວຽກງານໃນຂັ້ນຂອງຕົນເອງ ໃຫ້ດີທີ່ສຸດ. ສະນັ້ນ, ຍິ່ງກວ່າເວລາໃດໝົດພວກເຮົາຈໍາເປັນຕ້ອງເພີ່ມທະວີການຮ່ວມມືກັບຫລາຍຂະແໜງການ ແລະ ການຮ່ວມມືຮອບດ້ານໃນທຸກລະດັບ ເພື່ອພ້ອມກັນແກ້ໄຂບັນດາສິ່ງທ້າທາຍ ແລະ ຊອກຫາແນວທາງ ແລະ ວິທີແກ້ໄຂ ເພື່ອສາມາດບັນລຸໄດ້ເປົ້າໝາຍຕາມແຜນພັດທະນາລະບົບສະຖິຕິແຂວງອຸດົມໄຊ 5 ປີ ຄັ້ງທີ 2 ທີ່ໄດ້ວາງໄວ້.
ຂຽນໂດຍ: ຈັນມະນີ ຈັນຕະເງິນ
