ໂດຍປະຕິບັດຕາມ ມະຕິກົມການເມືອງສູນກາງພັກເລກທີ 032/ກມສພ ລົງວັນທີ 03 ມັງກອນ 2018 ວ່າດ້ວຍວຽກງານສ້າງແຜນກຳນົດພະນັກງານນຳພາ-ຄຸ້ມຄອງ ແລະ ແຈ້ງການຂອງຄະນະຈັດຕັ້ງແຂວງອຸດົມໄຊ ເລກທີ 1075/ຄຈຂ ລົງວັນທີ 10 ກັນຍາ 2020 ເລື່ອງການສ້າງແຜນກຳນົດພະນັກງານນຳພາ-ຄຸ້ມຄອງ ແລະ ການກໍ່ສ້າງບຳລູງພະນັກງານນຳພາ-ຄຸ້ມຄອງ
ມາໃນວັນທີ 18ພະຈິກ 2020 ກອງປະຊຸມສ້າງແຜນກໍານົດພະນັກງານນໍາພາ-ຄຸ້ມຄອງຂອງສູນສະຖິຕິປະຈຳແຂວງອຸດົມໄຊ ໄດ້ຈັດຂຶ້ນ ໂດຍການເປັນປະທານຂອງ ທ່ານ ຄຳດີ ວົງລ້ອມ ຄະນະປະຈຳພັກແຂວງ, ຫົວໜ້າຄະນະຈັດຕັ້ງແຂວງ;
ມີ ທ່ານ ນາງ ວຽງແກ້ວ ສິດທິວົງ ຮອງກົມຈັດຕັ້ງພະນັກງານ ກະຊວງແຜນການ ແລະ ການລົງທຶນ ພ້ອມທີມງານ, ທ່ານ ບຸນນະຄອນ ວົງດາລາ ຮອງຫົວໜ້າພະແນກຈັດຕັ້ງ-ກວດກາ ສູນສະຖິຕິແຫ່ງຊາດ, ທີມງານຂອງຄະນະຈັດຕັ້ງແຂວງ, ພະນັກງານສູນສຖິິຕິປະຈຳແຂວງ ເຂົ້າຮ່ວມ ລວມທັງໝົດ 19 ທ່ານ, ຍິງ 7 ທ່ານ.
ກອງປະຊຸມໄດ້ຮັບຟັງການລາຍງານສະພາບການຈັດຕັ້ງປະຕິບັດ ແຜນກຳນົດພະນັກງານນຳພາ-ຄຸ້ມຄອງ ໄລຍະປີ 2016-2020 ສະເໜີໂດຍ ທ່ານ ສົມລິດ ລັດສະເກດ ຮອງເລຂາຄະນະພັກຮາກຖານ,ເລຂາໜ່ວຍພັກ, ຫົວໜ້າສູນສະຖິຕິປະຈຳແຂວງ ໃນບົດລາຍງານໄດ້ຍົກໃຫ້ເຫັນວ່າ ໄລຍະ 5 ປີ ຜ່ານມາແມ່ນໄດ້ຈັດຕັ້ງປະຕິບັດຕາມແຜນກຳນົດພະນັກງານນຳພາ-ຄຸ້ມຄອງ ໄດ້ດີ ຊຶ່ງສາມາດ ແຕ່ງຕັ້ງ ຫົວໜ້າສູນສະຖິຕິປະຈຳແຂວງ 1 ຕ່ຳແໜ່ງ, ຮອງຫົວໜ້າສູນສະຖິຕິປະຈຳແຂວງ 1 ຕ່ຳແໜ່ງ, ຮອງຫົວໜ້າຂະແໜງ 1 ຕ່ຳແໜ່ງ.
ໃນໂອກາດດັ່ງກ່າວກອງປະຊຸມ ຍັງໄດ້ຮັບຟັງຄໍາເຫັນຊີ້ນຳຂອງທ່ານ ທ່ານ ຄຳດີ ວົງລ້ອມ ຄະນະປະຈຳພັກແຂວງ, ຫົວໜ້າຄະນະຈັດຕັ້ງແຂວງ, ເພື່ອເປັນບ່ອນອີງ, ທິດທາງໃນການຄົ້ນຄວ້າ ແລະ ຊອກຫາເປົ້າໝາຍບຸກຄະລາກອນທີ່ມີມາດຖານເງື່ອນໄຂ ທີ່ຈະກໍານົດສ້າງເປັນພະນັກງານການນໍາຫຼັກແຫຼ່ງຂອງສູນສະຖິຕິປະຈໍາແຂວງ ໃນຕໍ່ໜ້າ ແລະ ໄດ້ຜ່ານມາດຕະຖານ ເງື່ອນໄຂ, ແນະນຳບາດກ້າວ, ຂັ້ນຕອນວິທີການທາບທາມ ແລະໄດ້ດໍາເນີນການທາບທາມ ເພື່ອເປັນການຄາດຄະເນເປົ້າໝາຍພະນັກງານເຂົ້າໃນຕໍາແໜ່ງນໍາພາ-ຄຸ້ມຄອງ ແຕ່ລະຂັ້ນ, ທັງນີ້ ກໍເພື່ອແນໃສ່ຮັບປະກັນລັກສະນະສືບທອດປ່ຽນແທນຕໍ່ເນື່ອງໃນສະເພາະໜ້າ ແລະ ຍາວນານ, ທັງເປັນການກະກຽມບຸກຄະລາກອນໃນລັກສະນະເປີດກວ້າງ, ຕອບສະໜອງທາງດ້ານຈໍານວນ ແລະ ຄຸນນະພາບ, ໂຄງປະກອບດ້ານບຸກຄະລາກອນໃຫ້ຄົບຊຸດຕາມຄວາມຮຽກຮ້ອງຕ້ອງການຂອງໜ້າທີ່ການເມືອງແຕ່ລະຂັ້ນ ຂອງສູນສະຖິຕິປະຈຳແຂວງອຸດົມໄຊ.
ປະທານກອງປະຊຸມ ຍັງໄດ້ຮຽກຮ້ອງມາຍັງບັນດາສະຫາຍພະນັກງານ, ສະມາຊິກພັກ ຈົ່ງພ້ອມກັນສຸມສະຕິປັນຍາຄວາມຮູ້ຄວາມສາມາດ ແລະ ປະສົບການຕົວຈິງຜ່ານມາ, ຍົກສູງຄວາມຮັບຜິດຊອບຂອງຕົນ, ເປັນເຈົ້າການຄົ້ນຄວ້າເລື້ອກເອົາບຸກຄະລາກອນຜູ້ທີ່ມີຄວາມຮູ້ ແລະ ຄວາມສາມາດ ເຂົ້າໃນຕໍາແໜ່ງງານສໍາຄັນຕ່າງໆຂອງ ສູນສະຖິຕິປະຈຳແຂວງ ຢ່າງມີຄຸນນະພາບ.
ກອງປະຊຸມໄດ້ດຳເນີນ ເປັນເວລາ 1 ຕອນ ແລະ ປິດລົງດ້ວຍຜົນສຳເລັດ ຕາມລະດັບຄາດໝາຍ.
